Kas nabotosan a turayen, adelantado dagiti opisiales lokal iti Ilocos Norte gapu ta nasapsapada a nagsapada iti takem (ragup) idi Hunio 28, tallo nga aldaw sakbay a nagsapada iti takem da Presidente Duterte ken Bise Presidente Robredo idi aldaw iti Hunio 30.
Bongga ti “mass oath taking” dagiti opisiales lokal manipud gobernador, bise gobernador, bokales, mamayores, bise mamayores ken konsehales iti nadumduma nga ili ken syudad ditoy Ilocos Norte. Naangay ti nasao a pasken dita nangayed ken sikat a Plaza del Norte Hotel and Convention Center, Brgy. Balacad, Laoag City.
Gapu ti agkakadaeg a kawesda, permi ti kinapusaksak dagiti lady officials ken kinataraki dagiti gentlemen officials a nagsapada a sangapada nga indauluan ni Gob. Imee Marcos a nagbado ti Filipiniana dress a nadesinyo nga Abel Iloco. Saan met nagpaudi dagiti guests ken visitors a timmabuno ti pasken ta impakatda met dagiti agkakapintas nga aruaten a pang-sosyal.
Iti maysa a sentro ti atensyon ken isu ni former First Lady a nailayon a diputada (2nd district, Ilocos Norte) Mrs. Imelda R. Marcos. Immubing iti langana gapu ti rangrang ti Filipiniana gown-na a maris pink. Natadem pay lang ti panagpanpanunotna ken nabagas dagiti balikasna idi agbitla ti sango iti tilla-ong numan pay agtawenen ti 87.
Iti met bitla ni Gob. Imee seknan programana para ti sumaruno a tallo a tawen a maikatlon a terminona, ikkan ti administrayonna ti naan-anay nga asikaso para ti benepisio dagiti Senior Citizens, Indigenous People ken Persons with Disability, food producers ken vendors, jeepney ken tricycle drivers. Kangrunaanna ti amin, ti libre nga edukasyon para kadagiti agbasa ti kolehio, ken skills/vocational training courses para kadagiti dadduma pay nga agtutubo.
Adda a balikas nga “So help me God” ti murdong iti oath of office dagiti nagsapata. Rumbeng ngarud nga akmenda iti turay nga inkawes kadakuada dagiti umili babaen ti natarnaw, nalinis ken awan mulitna a panagserbi tapno tulongan ida ni Apo Dios a Mannakabalin.#
