Pammalagip dagiti appo a nagannak

Nakakaalinggaget ken makasidduker ti napagteng iti maysa a nalapsat a balasang nga innaga nan ti polisia a ni Jemima Kezia Mata Andres, edad 19, taga-Currimao, Ilocos Norte ket estudiante iti Mariano Marcos State University, Batac City main campus. Nasarakan ti bangkayna a naiwalang ti igid iti national highway idiay Brgy. San Cristobal, Sarrat, Ilocos Norte idi bigat iti Martes, Agosto 4, 2015. Adda maysa a tama iti paltog ti akin kannawan a paset iti ulona. Maysa a kaso iti murder ti nasa-o nga insidente. Maatap a ti maipagarup a nobiona ti akin-aramid iti krimen ta isu ti naudi a kinadduana a naglugan ti puraw a Montero SUV karabian iti pammapatay. Nagtiponen ti pwersa ti polis ken NBI agents a mangan-anop ti suspek. Hustisia ti kalikaguman ti pamiliana.

Nakaskas-ang a panunoten a maysa manen nga agtutubo ti nasapa a nairisang ti biagna babaen ti nadamsak nga ipapatay. Gagangay ti agkabannuag nga adu dagiti napintas nga arapaapna iti biag babaen ti edukasyon. Agturposton koman ti kolehio ti nasa-o a biktima. Ngem nakiltay amin nga arapaapna gapu ti napait a trahedia.

Umarngi daytoy a kaso ti panakapapatay itay nabiit ni balasitang Dona Mae Doña a taga-Brgy. Casili, Laoag City. Natatek ti bangkong ti bagi iti biktima idi masarakan da ti bangkayna dita Talingaan sand dune. Aggingga ita, saan pay nasolbar ti kaso iti laksid a nangidiaya ti pamiliana ti P100,000 a gunggona para ti ania a maited nga inpormasion a mangitudo ti kinata-o iti kriminal nga akin-aramid ti nasa-o a pammapatay. Iyik-ikis ti pamiliana ti hustisia

Pammalagip kadagiti nagannak: Bantayan yo a nalaing dagiti annakyo. No kasapulan iti nainget a disiplina, ipakatyo para ti pagsayaatanda met laeng. Iliklikyo ida ti dakes a bisio, panaginom ti serbesa, panagsigarilyo, panagballog ken panakibarkada ti uray asinno ditan a polano wenno polana. Ti nasken ket mapagturposyo ida ti kolehio tapno naraniagto ti masakbayanda iti biag.#