Maysa a Gas Depot wenno paggasolinaan ti naipasdek idiay dayaen latta ti Centennial Arena ditoy syudad iti Laoag itay nabiit. Maysa daytoy a gannuat iti Metro Ilocos Norte Council (MINC) ti salinong iti Kapitolyo. Kayatna ngarud a sawen a kukua daytoy ti gobierno probinsial?
Napintas ti gagemna daytoy a proyekto ta matulonganna dagiti grupo iti transport group wenno dagiti gimong iti buses ken trisekelan a kangrunaan a puntirya a serbian daytoy a gas depot. Segun ti report adda a dakkel a diskuento ti maited kadagiti parukyano a trisekelan ken bus operators a benepisaryo iti MINC. Dakkel a pakaalay-ayan ti gastos iti gasolina no adda diskuento nangnangruna ta kanayon ti panagngato-ngato ti presio iti gasolina. Sagpaminsa met nga adda panagbabana ngem pammagusto laeng.
Iti biang dagiti pribado a paggasolinaan, ditay maikkat ti negatibo a reaksyonda ngamin di mailibak a maapektaran ti bukodda a negosyo. Saan ngata met nga isu ti mitsa iti panakalogida tapno mabangkarote ti negosyoda a paggasolinaan. Adunto latta ti parukyanoda ta umad-adu met ti luglugan ditoy probinsia nga agkasapulan ti gasolina. Daytoy ti ganasna ti makunkuna a free enterprise ditoy pagiliantayo.#
