Pagbasuraan iti Laoag nasken a moderno ti pasilidadesna

editoryal

Issue: December 5-11, 2016


Sentro iti kontrobersya ti pagbasuraan iti Laoag City itoy a lawas gapu ti adda panagtukkiad dagiti apektado a bumaranggay iti Lagui-Sail ta kontraenda ti main-inaw nga expansion plan program iti nasao a garbage dump site.

Adda met ketdi puntos dagiti bumario nga agreklamo gapu ti rasion pakaseknan iti salun-at dagiti agnaed dita a lugar. Uray siasinno man a tao, natoral laeng a salaknibanna ti salun-atna kontra iti tuma-od a sakit a maparnuay iti dakes nga aglawlaw.

Ngamin, open garbage dump site ti parikut dita a lugar. Segun ti pammilin iti Department of Environment and Natural Resources wenno DENR, nasken a mapagbalin dayta a pagbasuraan iti syudad a pudpudno a Sanitary Landfill site a haan ketdi a kas iti agdama a tiwa-ak.

Nabayagen daytoy a pammilin iti DENR ngem adu’t lehitimo a rasion ti gobierno iti syudad nu apay a di mairugi-rugi numan pay situtodyo a mangtungpal ti direktiba iti nasao nga agensia iti gobierno nasional pakaseknan ti solid waste management.

Nabunga ti dialogo pakaseknan ti pagbasuraan a naangay idi Mierkoles, Dec.7 a timmabunuan dagiti opisiales ti syudad, barangay officials iti Lagui-Sail ken dagiti taga-GLEDCO a kooperatiba dagita amin nga empleados iti city government.

Napintas ti diaya iti GLEDCO nga isuna ti pribado a mangtarawiwid ti panakaipasdek ti moderno a Sanitary Landfill facilities dita Lagui-Sail. No moderno kuna tayo– naurnos, nadalimanek ken natalged ton ti sistema a panaka-estimar dagiti binunbunton a basura a maak-akup manipud kadagiti nadumaduma a barbarangay ditoy Laoag.#