Date published: January 2-8, 2017
Napintas ti rubbuat ti liderato iti OWWA (Overseas Workers Welfare Administration) iti daytoy a tawen 2017. Apagtapog ti Enero, addan dagiti opisiales ken staff iti OWWA Region I nga immay ditoy probinsyatayo nga Ilocos Norte tapno ituloyda ti pangted a trabahoda nga agibunong ti ayuda pinansial para kadagiti apektado ti Bagyo Lawin a kamkameng iti OWWA.
Dagiti mismo a kamkameng iti pamiliada ditoy luglugartayo ti direktamente a benepisaryo nga immawat ken umawat to pay laeng ti nasao nga ayuda pinansial iti laksid nga adda dagiti kakabagianda nga OWWA members idiay ballasiw taw nga agtratrabaho.
Naurnos man ti sistema iti OWWA panggep daytoy. Naammuanmi a dumanonen dagiti taga-OWWA a mapan kadagiti nadumaduma nga ili tapno ituloyda ti panagibunong kadagiti nasao nga ayuda.
Kumpara iti napalabas, naruay dagiti timma-od a reklamo gapu ti atiddog a pila dita maysa a paset ti Kapitolyo probinsial ditoy Laoag City.Adu dagiti nagparbangon a nagpa-Laoag manipud ti nasulinek nga away iti ili a nakipila iti kapudotan ngem naupay da a nagawid ngamin nagkamtod ti nalatang a pondo iti OWWA.
Itan inpasegurado dagiti taga-OWWA a sapasap a maikkan ti ayuda amin a kualipikado a benepisaryo. Saludduan mi dagiti taga-OWWA a pagwadan no serbisyo publiko iti pagsasaritaan. Kasta koma ti kina-alibtak amin nga ahensia iti gobierno.#
