OIN agtayaktak manen, adda kad utek-paltat a politikos?

Nasubok ti pwersa ti One Ilocos Norte (OIN) idi nakirinnamas iti basingkawel ti politika ti naglablabas nga eleksion. Binuangay dagiti Marcoses ti OIN idi ta nakapagsublida ditoy Pilipinas, partikular ditoy Ilocos Norte sumagmamano a tawen kalpasan ti 1986 Edsa Revolt a nangpalisi kadakuada iti turay.

Nasuot ti bileg ti OIN kontra kadagiti duduogan a politiko ditoy probinsia. Resulta: Mayoria ti nagballigi iti kadagupan dagidi nagtaray ti sidong ti OIN. Napigsa ngamin ti makinariana. Ditay maikkat a napigsa pay laeng ti inpluwensia ti apelyido a Marcos daydi Apo Ferdie.

Agpayso a nasukog ti OIN ngem saan a perpekto. No koma burnay ket damili nga adda tippingna, adda rikki na. Apay? Ngamin, saan met a solido ti OIN. Adu met ti nagtaray kas oposision kontra OIN iti naglablabas nga eleksion lokal. Adda met dagiti nailapso a kandidatos ti OIN iti sumamano nga ili. Mayat met ketdi ta dayta ti mangipasimudaag nga adda demokrasia. Awan ti anag ti demokrasia no pasig tayon a kasla natuktokan a bisukol wenno memem a karnero.

Itay nabiit, kalikagum ni Gob. Imee Marcos babaen kadagiti taga-media nga agpayagpak koma manen ti One Ilocos Norte into 2016 a panagpipili lokal. Inumsina ti political dynasty ditoy probinsia tayo. “Matindi ang dynasty dito”, kinuna iti Tagalog. Ti pammadi ti kaaduan ket pagtitinnawidan ti pwesto (elective) gapu ta kaka-apelyido da ti nabileg a politiko iti luglugarda, innayonna. Inparipiripna pay a masapul nga ulluen da koma ti botosda no tiempo ti eleksion ket saan ketdi nga agdedependida lattan ti kabagianda a nabileg a politiko. Reject pay kenkuana dagiti kandidatos a “kulilat ang kaisipan”. Kayatna seguro a sawen pwera utek-paltat?

Kaykayat ni Manang Imee a dagiti koma bagets wenno agkabannuag ti kangrunaan nga agkandidato. Dagiti kualipikado a bagets ket agtukkiadda kano ta kaykayatda ti agtrabaho idiay ballasiw taaw ta al-alisto ti agakup ti kuarta sadiay. Nadlawna pay a dagiti a last-termer a politiko ket sumadotdan nga agtarabaho iti bukodda nga LGUs.

Siimentayo ah, no asinno dagiti manoken ni Manang Imee wenno asinno dagiti isalogna a babagets a kandidatos na iti payong ti One Ilocos Norte inton 2016. No kinunana a saan koma a pagtitinnawidan ti turay, exempted ngata dagiti nasinged a kakabagianna?#