Natu-ok no nairot ti trapiko

Agrekrelamo ken aganil-il dagiti narway a motorista ken pasaheros no tiempo ti inaldaw a rush hours ti bigat ken ti malem. Isuda dagiti agdaldaliasat dita pasetna ti Brgy. Nangalisan, Laoag City, mangrugi ti approach ti Gilbert Bridge agturong ti abagatan. Dita a deppaarna ti Nangalisan ti ayan iti inaldaw a nairot a trapiko gapu ti adu a luglugan nga agpa-sentro ken rummuar ti Laoag .

Gapu ta maseknan ti amin iti daytoy a problema, nagtignay ti Hunta Probinsial nga indauluan ni Bise-Gob. Angelo Marcos Barba. Nainbitaran ken dimmatag ni DPWH District Engineer Nestor Pasion ken ti private contractor. Timpuar ti parikot nanipud narugian ti Road Widening project ti DWPH dita a kalsada. Napintas ti proyekto ta lumawanton ti national highways ditoy Laoag ken iti sapasap nga Ilocos Norte.

Segun ti plano, mapattapatta a mairingpas ti nasa-o a road widening agingga ti Hulyo 2015, sakbay a nakaronton ti nepnep a tudo. Awan ti nabatad a solusyon nga indasar ti DPWH tapno malay-ayan ti sagsagabaen dagiti motorista ken daily commuters. Numan pay kasta, inkari ti liderato ti DPWH nga aramidenna amin a pamuspusan tapno naannayas ti agos ti trapiko dita a paset ti national road.

No maminsan, nareklamo ti tao ta ngamin kaaduanna ti nairuam ti nam-ay. Wen met ketdi, ta asinno koma ti mayat nga agrigat. Ala bassit laeng a panawen nga agtu-ok tayo iti nairot a trapiko dita a disso. Ti agan-anus, isu ti bendesionan ni Apo Dios.#