Nasair ti rikna ni madam Meyor

editoryal

Date Published: January 16-22, 2017

Dua nga aramid ti tao nga haan a maikannatad ti naipadpadamag  ditoy Ilocos Norte ita a lawas, partikular seknan ti pakaluksawan iti rikna ni Laoag City Mayor Chevylle Fariñas.

Maysa ti unauthorized electric connection a nadiskubre dita Laoag commercial complex nga ayan ti tiendaan pampubliko.  Iti unos ti napalabas a tallo a tawen, haan a napupuotan nga imbaklay ti city government ti panakabayad ti kunsomo iti koriente ti maysa a flower shop a kukua ti maysa a lalaki a negosyante a masarakan ti abay iti escalator ken City Mayor’s Office (annex) dita tiendaan.

Maikaddua a nakapikaran ti rikna ni apoMayora ket maipanggep ti nabigbig nga impostor a nagpamarang nga empleado iti city government ket nag-solsolicit ti kuarta kadagiti business establishments. Kas modus na a nagsolicit, pinagpambarna ti multi-decorated Kalesa Parade iti tinawen a Pamulinawen festival ditoy Laoag inton umay a Pebrero.

Nateppel ketdi ni apo Mayora a nangtratar kadagitoy dua a pasamak. Nadlaw dagiti padami a taga-media a natanang isuna nga ag-desisyon. Dengngenna ti palawag dagiti amin a nagbiddot a pulano ken dagiti kakumplotda, no kas pagarigan  adda man. Alaen na ti palawag  ti agsinnubangir a partidos sananto ipaima ti kaso ti biang ni apo City Legal Officer tapno masurot ti makunkuna a “due process”.

Sapay koma ta marisut babaen ti legal a proseso dagitoy nagkaddua a pasamak tapno haan ton a maulit pay iti sumarsaruno a gundaway.#