NARISGO

Tured pakinakem ken karadkad ti inpamatmat dagiti nasiglat a Rescue Team a napan nangarayat kadagiti naruay a pamilia a nalayus ti pagtaenganda idiay bassit nga isla iti Sitio Bungro, Brgy. Pragata, Pasuquin, Ilocos Norte.

Rabii idi Sabado, Hulyo 29 a kangitingitan ti napigsa a tudo ken angin a gubbuay ti nepnep nga epekto ti tartaraipos ni Bagyo Gorio idi sinaranget ti Rescue Team iti Pasuquin Municipal Disaster and Risk Reduction Management Council ti peligro gapu ta narisgo iti misyonda idiay nasa-o nga Isla Pragata.

Naigiddato ti sabali pay a rescue operation idiay Brgy. Davila ti isu met laeng nga ili iti Pasuquin. Adu met a pamilia iti mangngalap ti na-”evacuate” kalpasan a dinupprak ti nagdadakkel a dalluyon wenno “storm surge” dagiti balbalayda a naipasdek ti asideg ti babay. Haan laeng a dagiti pagtaenganda ti nadadael ngem ketdi dagiti adu a bilogda a pagkalap.

Narigat ti akem dagiti Rescuers. Dakkel a sakripisyo. Arigna inpustada ti kakaisuna a biagda gapu ti prinsipyo a makasalbarda ti biag iti padada a tao.

Tumutop laeng a maikkan koma dagitoy a Rescuers ti pammadayaw kas pammigbig ti nabalitokan a nagapuananda tapno kasta isuda ti agserbi a pagwadan dagiti agdama ken sumarsaruno a kaputotan.#