Napateg ti adal

Gapu ti agtultuloy a gubat idiay Marawi City, a paset iti Mindanao, dua nga ubbing a Muslim ti nailibas idiay nariribok a lugarda ket ditoy Batac City, Ilocos Norte ti immayanda pagnaedan babaen ti tulong dagiti nasinged a kakabagianda met laeng a Muslim.

Ti kangrunaan a rason: Tapno ditoy ti pagbasahaanda iti elementarya. Daytoy ti mangpaneknek ti kinapateg ti adal. Nalabit iyarig dagiti nagannak kadagitoy dua nga ubbing a kasla balitok ti kinapateg iti adal, gameng a haanto pulos marabsot tungpal biag.

Ngamin inkalikagumda nga intalaw isuda piman idiay pagbabakalan ti Marawi tapno maikkanda ti gundaway a manggun-od ti edukasyon, no sadino a ditoy Ilocos ti makitada a lugar a nalinak ken natalna.

Saludarantayo ti DepEd school division iti Batac City agsipud ta sitatallugodda a nangpasangbay kadagitoy dua nga ubbing a taga-Marawi City iti pagadalan a sakupenda.

Numan pay ima-ima ken awananda ti naan-anay nga school record gapu ti di agsarday a riribok idiay naggapuanda a lugar, sipapalubos dagitoy taga-DepEd Batac City school division a nangi-enroll kadakuada kas maiyannatop ti kangatuan a pammilin iti DepEd Central Office.

Dakkel ti pammatimi nga alistoda a maiyadaptar ti bagbagina a makilangen-langen kadagiti classmates da nga Ilocano nga ubbing babaen ti superbisyon dagiti naanos a mangisursuro ken natulong a turayen iti pagadalan. Awan ti imposible no natibker ti panagkikinnamayet.#