January 18-24, 2016
Segun ti polisia, pimmusayen ti maatap a murderer a ni Victorino Mangabat Jr. alias Jay Ar Mangabat wenno alias Francis Domingo Ortega. Nagsatan ti anges idi malem ti Martes, Jan. 19 bayat a matamtaming ti sugatna iti barukong iti maysa a hospital idiay Tuguegarao City, Cagayan, Region 2. Nagsagaba isuna ti sugat agsipud ta kayatna nga agawen ti paltog iti polis a nang-arestar kenkuana bayat ti police operationa idiay Tuguegarao. Pimmutok ti paltog ken natamaan ti barukongna idi nagrinnamasda.
Maibilang ni Mangabat a Most Wanted Person ditoy Ilocos Norte ken kabangibang a probinsya a nagaramidan iti agduduma a krimen. Idi Agosto 4, 2015, isuna ti maatap a nangpapatay ken ni Jemima Kezia Mata Andres, 19, balasang, agnaed ti Currimao, Ilocos Norte ken senior student iti Mariano Marcos State University, Batac City. Segun ti polisia, nagpamarang isuna a civil engineer, nagkasira ti Batac, naam-ammuna ti nalapsat a balasang a ni Jemima babaen ti Facebook agingga a nanobiana.
Agsipud ta natay metten daytoy a pugante a tao, kuna ti polisia a sarado aminen dagiti kaskaso kriminal kontra ken ni Mangabat.
Iti biang ti pamilia ni Jemima kunada a nagun-odan ti hustisia numan pay nakas-ang latta ti napasamak iti ipatpategda nga anak.#
