Nagbosi manen ti Armalite

(Iluko version) Haan pay laeng a nabayag (tawen 2015) a nagretiro ni Police Senior Supt. Jeffrey T. Gorospe iti serbisyo ngem haanna metten mananam ti napintas a biag iti maysa a “retiree”. Ngamin, insikapda a kiniltay ti kakaisuna a biagna idi rabii iti Martes, Agosto 8, 2017 ti mismo a teritoryana idiay, Sarrat, Ilocos Norte kalpasan a naggapo isuna ken ti bunggoyna iti gallera.

Kadduana nga agsasango dagiti papagayamna ti uneg iti kubo-kubo a kukua ti enhinyero a gayyemna idiay Brgy. 7 nga asideg ti pagtaenganna idi kellaat a pinaltoganda isuna babaen kadagiti armado nga estranghero a dagus a naglibas kalpasan ti krimen. Isu laeng ti puntirya dagiti suspek gaputa nagbosi ti Armalite M-16 rifle ngem haanda met nga inraman dagiti kakadduanna iti dayta a kanito. Dead on arrival ni Sir Jeffrey idiay ospital.

Idi simrek ti serbisyo a kas bagito a kameng ti PC-INP idi tawen 1987 agingga a nagbalin nga hepe iti polisya ditoy Laoag City nga isu ti nagretiroanna, nalasat ni Sir Jeffrey Gorospe ti adu a nakana a peggad ken pannubok a kas soldado ken polis. Nasaem a panunoten gaputa itan a retirado ken haan unayen a makagaway, isu metten ti panangisikapda ti biagna.

Addan pamurpurdotan ti nabukel nga Special Investigation Task Group no ania ti motibo iti pammapatay, ngem dida pay kayat nga ibutaktak iti media ken publiko bayat ti panagurnongda iti natibker nga ebidensya, segun ken ni Chief Inspector Dexter Corpuz, panakangiwat iti Ilocos Norte police provincial office.

Naruay a pammadayaw ken medalya (lokal ken nasional) ti nagun-od ni Sir Jeffrey bayat ti kaaddana iti serbisyo. Numan pay dinan maimutektekan pay ti eulohia (eulogy) tayo gaputa simminan a napanen iti sabalin a biag, tumutop laeng nga ipabalontayo ti naimpapusoan a panagraem, saludo ken panagkararag para iti maysa a pagayam a nagbalin a pagwadan a kas nangtagibin iti linak ken talna ditoy Ilocos ti unos iti dandani tallo a dekada.#

Photo credits: Dennis Gabriel Alipio