Published: October 3-9, 2016 issue
Flying school kunada iti pagsasao nga Ingles a kas angaw a sarita a pang diskribir iti gallera wenno pagpapallotan dagiti kawitan a manok a para tadi. Dita ngamin a disso ti pakakitaan ti sugal nga umatipugpog. Tunggal agtayab dagiti aglaban a manok, a buyogan ti ikkis ken riaw dagiti mammallot, adu a pirak ti tumayab wenno mayawyawlattan iti apag-darikmat. Dagiti mangabak isuda ti nagasat.
Daytoy kano ti klase a sugal a paggugusto dagiti malalaki ken mamaingel. Uray ania man a tukad ti panagbiagmo iti sosyodad, silulukat ti ruangan iti gallera a mangpasangbay kenka, llamado wenno dehado. Paseten iti kulturatayo a Pilipino daytoy a duduogan a sugal nga inruam kadatayo dagiti appo nga Espanol a nangsakup ti Pilipinas iti unos ti 300 a tawen.
Mainaig ti gallera, timpuar ti parikut a nabara iti agdama pakaseknan ti kontrobersyal a Sarrat Cockpit Arena dita ili iti Sarrat, Ilocos Norte. Natakkuatan a maipagarup nga illegal kano ti operasyonna ti rason a kaawan ti tumutop a papeles na ken dadduma pay a dokumentos a mangpasengked ti panagoperar na a kas lehitimo a negosyo.
Agpapallot dagiti rason ken kapanpanunotan dagiti maseknan nga agtuturay tayo partikular ti Sangguniang Panglalawigan iti Ilocos Norte ken dagiti opisiales lokal iti Sarrat LGU. Awan ti mayat nga umamin ti panagliway.
Numan pay kasta, liklikan koma ti personal a panagbibinnara. Suroten ti legal a proseso a panagusig agingga a marisot ti parikut ken mailinteg ti kamali.#
