MMSU: Tatak “Excellence in Education”

9dfe_top2No de-kalidad nga edukasyon ti pagsasaritaan, naaweng ti nagan iti Mariano Marcos State University ditoy Ilocos Norte. Itay nabiit, napaneknekan manen ti MMSU ti kinalaing dagiti estudyantes a nagturpos iti Unibersidad ti benneg iti kurso a Nursing. Tallo kadakuada ti simrek iti Top Ten itay kallippas a Nursing licensure board examination. Maysa ti nakagun-od iti puesto a Top 6th ken dua ti agpada iti rangko a Top 10th. Pasig a nalaslasbang a babbalasang dagitoy a tres Marias.

Kangrunaanna pay, ti Class Batch dagitoy a tallo a topnotchers ket 100% a pimmasada amin iti nasa-o a Nursing board exams. Awan pulos naaros kadakuada. No idasig, manmano kadagiti kolehio ken universidad iti entero a Pilipinas ti makagun-od ti kasta a sangagasut a porsiento a makaruar ti ania man a klase ti licensure board exams.

Haan a datdatlag nga “Excellence in Education” ti slogan iti MMSU. Ngamin, iti naglablabas a naangay a licensure board tests iti nagduduma a kurso agraman iti bar exams para kina-abogado, naruayen nga MMSU Alumni ti nagballigi nangnangruna dagiti nagbalin a Top 10 board passers.

Rumbeng laeng a de-kalidad nga edukasyon ti tatak iti MMSU agsipud ta punponduan isuna ti gobierno tayo. Ti tinawen a minil-milyon a pondana ket aggapu iti kuarta a buis dagiti tatta-o, datayo nga umili.

Ipagtangsit tay ngarud daytoy a nagun-odan manen a balligi iti MMSU. Kayatna a sawen, a nalalaing ken nasaririt dagiti mangimatmaton ken mangisursuro iti Unibersidad. Saludo kami Sir ken Ma’am.#