Tunggal eleksion idi panawen ni Apo Lakay (Presidente Ferdinand Marcos), natibker ti makunkuna a Solid North (SN) para ti lideratona ken ti partidona a Kilusang Bagong Lipunan (KBL). Solido nga Amianan ti kayatna a sawen ti Solid North.
Sakupen ti Solid North idi ti Rehion Uno (Ilocandia), Rehion Dos (Cagayan Valley) ken Cordillera Administrative Region (CAR). Sangsangkamaysa a mayorya ti botos nga agkagapo kadagitoy a tallo a rehion a sakupen ti Solid North (SN).
Layus a botos ti SN mapan para ken daydi Apo Lakay ken dagiti kapartidona ti KBL. Isu nga dayta ti gapuna a dakkel ti SN a pagrubbuatan ti KBL idi no tiempo iti panagpipili nasional.
Daksanggasat ta nawatakwatak ti Solid North kalpasan a napalisi iti turay ni Apo Lakay. Numan pay kasta, adu pay laeng ti “silensio” a suporters ti Solid North kas impasimudaag ti panangbitibitda ken ni Bongbong Marcos (junior daydi Apo Lakay) idi nagkandidato a para senador. Nagasat ta nangabak.
Ita ta agngayangay ni Bongbong Marcos (BBM) a para bise presidente, mabbiagna ngata ti makunkuna nga orihinal a Solid North? Iti sabali a bangir, no anagen dagidiay balikas ti manangenna a Gob. Imee Marcos bayat ti ambush interview dagiti media ti kasla tumtumbokenna a Solid North ket isu ti sakupen laeng iti Ilocandia. Kasla agdudua pay gapu ti balikasna a bareng “maka-tsamba” kano. Siimentayo ah.#
