Saan a ginggined ti nangdayyeg ti probinsia idi Lunes, Junio 01 ngem ketdi maysa a makapagsidduker a damag seknan ti pannaka-ambush da ABC president Alex Calucag ti ili a Solsona, Ilocos Norte ken ti security escort na nga isu ni Police Officer 3 Rodante Julian a tubo ti ili a Piddig, Ilocos Norte. Agkabagian da Alex ken Rodante, segun ti report.
Piman, insigida a natay ti polis gapu ta napuruan ti tengngedna ken sabali pay a parte ti bagina. Nagasat met ni Apo Calucag ta nalasatna ti kumpay ni patay numan pay grabe met ti sinagabana a tama ti bala ti paltog. Natatek ti bala iti paltog ti SUV Montero a nagluganan dagiti dua a biktima. Madama nga agawid dagiti dua idi tambangan ida dagiti naka-armalite ken naka-Cal .45 pistol nga ambushers idiay paset ti Brgy. Nalasin, Solsona, segun ti police report. Numan pay nagsayasay ti adu a dara iti bagi ni Apo Calucag, naimanehona pay laeng nga inyadayo ti SUV iti agarup a maysa a kilometro manipud ti crime scene.
Di maliklikan ti media a trataren a dakkel a damag ti nasa-o nga insidente agsipudta seknan daytoy ti linak ken kappia ti probinsia ti Ilocos Norte. Masukan-sukat ti nagserbi a police provincial director ditoy probinsia tayo ngem kaskasdi latta a saan nagparbeng ti pinnatay ken agpapatay. Idi tiempo da PD Antonio Mendoza ken PD Sterling Blanco, sumagmamano a krimen a pammatay ti napasamak bayat ti panangidauloda ti kapolisan ditoy Ilocos Norte. Adda nasolbar, adda met dagiti saan a nasolbar. Iti agdama, agsasaruno dagiti krimen a pammapatay. Kasla, masusu-ot ti liderato ni OIC PD Albert Erasquin Ocon, a tubo ti ili a San Jacinto, Pangasinan. Nasapa unay nga husgaran ti kabailanna a mangidaulo ti kapolisan. Nalabit, adda ngata met bukodna nga estratehia kontra krimen tapno magun-od ti naan-anay a linak ken kappia ditoy Ilocos Norte. Kas kadagiti immuna a PD a nagtugaw dita Kampo Juan, makuna tayo a de calibre a police officer ni Apo Ocon ta natinneb iti serbisio nga agserbi ken mangsalaknib kadagiti umili. Ti nasken, agpannuray koma ti agnanayon a linak ken talna ditoy kabukbukodan tay a probinsia.#
Cover photo: PO3 Rodante Julian: Inbuisna ti biagna para iti natalna a kagimongan
