Lagip dagiti napasag

12439521_943738915714116_6452363999116368963_nEksakto a 44 a bandera iti Pilipinas ti naiwagayway iti sangnguanan ti Kapitolyo probinsial iti Ilocos Norte. Simbolo ti pananglagip kadagidi 44 a kameng iti Special Action Force (SAF), Philippine National Police a napasag idiay Mamasapano engkuentro, Magindanao pakairamanan ni PO3 Omar Nacionales, tubo iti Marcos,Ilocos Norte.

Enero 25, Lunes, anibersaryo iti nakakaalinggaget a dangadang idiay Mamasapano. Linagip ti probinsia iti Ilocos Norte ti kina-bannuar dagitoy a SAF commandos a nangibukbok ti darada bayat ti panakirinnupakda kadagiti pangen iti nagtipon pwersa iti MILF ken dadduma pay nga armado a rebelde idiay Mindanao.

Nagballigi ti misyon Oplan Exodus a nangparmek ti maysa a pagbutbotngan a terorista a gangganaet ngem kasukat met ti 44 a biag dagitoy a SAF commandos pakairaman ni PO3 Omar Nacionales iti Ilocos Norte. Adu a lulua ti nagarobos ken sasainnek dagiti naulila a pamilia nga aginggana ita gumawgawawada ti hustisia ken pannulong iti gobierno.

Iti sangnguanan ti Kapitolyo, bigat ti Enero 25, nagaritungtong dagiti naruay a tattao a dimmar-ay ti nasa-o nga annibersayo: opisiales ken empleados ti gobierno kasta pay dagiti pribado nga umili. Naidaton ti misa, sabsabong ken kararag. Gimloong ti 21-gun salute. Naliday ngem nabagas ti nangngegan a bitla da Gob.Imee Marcos ken ti ama ni pimmusay a PO3 Omar Nacionales a binayabay ti inana ken kakabsatna.

Di bumurong a tinawen-tawenton a malaglagip latta ti kinabannuar dagitoy 44 SAF commandos kas met ti pananglanlandayag tayo ti kinabannuar dagiti appotayo a soldados ken guerillas a Pilipino a nakidangadang ken nangparmek kadagiti kabusor a gangganaet idi naglabas a gubat iti sangalubongan.

Kasta pay a malaglagip dagidi mamaingel a soldados a kameng ti 1950 Philippine Expeditionary Forces to Korea (PEFTOk) idi bimtak ti guerra idiay pagilian iti South ken North Korea. Ti nagan iti demokrasia, nagayos ti dara dagidi napasag ken nadundunor a soldados a Filipino. Maysa kadakuada ti KIA (Killed in Action) a taga Paoay,Ilocos Norte a ni Army Pfc Sergio “Serapio” Pobre Guiang nga immawat ti posthumous highest Purple Heart Medal babaen kenni US President Harry Truman. Kas kadagiti padana a napasag a PEFTOk a soldado a mabigbig a bannuar, nabungon ti bandera iti Pilipinas ti lungonna idi sabten dagiti inulilana a pamilia ti bangkay na idiay eropuerto.#

*Photo courtesy of Alaric Yanos/PGIN-CMO