Kultura iti di pannakadusa

Senebraran ti National Press Club of the Philippines (NPC) iti bukodna a 63rd founding anniversary a naangay idiay Manila itay nabiit. Ni Senador Ferdinand “Bongbong” Marcos Jr. ti nagserbi a kangrunaan a sangaili iti nasa-o nga pasken. Ti NPC isu ti nailian a gunglo dagiti amin a kamkameng iti media ditoy Pilipinas. Iti agdama, rinibribu nga indibidual ti kamkamengna daytoy a gunglo nga aggapu ti print and broadcast media iti entero a Pilipinas.

Bayat ti panagbitla ni Senador Bongbong iti nasa-o nga okasyon, inkarina ti pannaisardeng ti pannakapapatay dagiti kamkameng iti media (media killings) ken pannakaguped ti kultura iti di pannakadusa dagiti akin-aramid ti kremin (culture of impunity). Nalabit narway a pada nga agirakrakurak ti maragsakan no dayta ti maysa kadagiti plata porma ni Apo Bongbong, a nagpila a kandidato a para bise-presidente inton eleksyon 2016.

Sapay koma ta no agballigi a mangabak into eleksyon, itungpalna koma dayta a karina tapno saan a maipada kadagiti ubbaw a karkari laeng dagiti padana a lideres iti pagiliantayo.

Ditoy bukodtayo a lugar ditoy Ilocos Norte, adda tallo a kameng ti broadcast media ti napapatay iti naglabas a taw-tawen. Ditay masinunu-o no nagun-oden ti hustisya dagiti pamilia da Dios-ti-aluadna a radio commentators Roger Mariano, Lito Agustin ken Andy Acosta.#