Tallon a planta iti windmill power ti naipasdek ditoy bukodtayo a probinsia ti Ilocos Norte, partikular idiay Bangui, Burgos ken Pagudpud. Agpataudda dagitoy tallo a planta ti elektrididad babaen ti angin a mangwerret ti turbina dagiti higante a paligpalig. Higante a bentilador, kuna dagiti masmasdaawan nga u-ubbing.
Ammoyo kadi a saan tayo a direkta a masagrap ti koryente a patauden dagitoy a windmills? Nangin-ngina nga amang ti presio na no direkta a maangkat dagiti koryente manipud kadagiti windmills ken kasta pay ti solar energy, imbutaktak ni Rey Lazo, agdama a board president ti Ilocos Norte Electric Cooperative.
Ngamin ti windmill ken solar energy a partuaten dagitoy a power plants ket i-supply da a kumamang ti National Grid Corporation of the Philippines, dati a NAPOCOR idi. Ti met NGCP, ipasana dagitoy a koryente iti Wholesale Electricity Stock Market wenno WESM. Ditoy ti pagangkatan dagiti nadumaduma a electric cooperatives ken kompania ti electrisidad ditoy pagilian.
Isu nga ti INEC a mangsusuply ti koryente tayo ditoy Ilocos Norte ket gatgatangenna ti koryente iti ruar ti probinsia iti rason a nalaklaka kano nga amang ngem no direkta a makikontrata kadagitoy windmill farms ditoy bukodtayo a lugar. Apay ngata? Masapul nga ilawlawag a nalaing ni Apo INEC president Lazo wenno ni INEC general manager Bing Agdigos daytoy a banag tapno kasta saan a manglangit-langit ti panunot dagiti padatayo a naruay a konsumers.#(jun r. guiang) (Photo courtesy of PGIN CMO)
