KINALASBANG, KINASARIRIT

Editorial Logo

Ni kandidata a Miss Paoay Dianne Irish Joy Lacayanga ti nangabak a kas Miss Ilocos Norte 2017 bayat ti naangay a tinawen beauty pageant a salip dagiti agtutubo a babbalasang ditoy probinsya kas paset iti fiesta ni patron saint La Virhen Milagrosa. Reprep iti tattao ti nagbuya ti nasao a pasalip idiay Centennial Arena, Laoag City idi May 16, 2017. Naimbag ta nalamiisen ti uneg iti Arena a dati a nakabarbara a kasla pagpugonan iti tabako. (Moderno kano a giant Ventilator, haan nga airconditioning system, ti naimontar, segun ti maysa a provincial consultant itay kallabes).

Tunggal ili ken syudad ditoy Ilocos Norte ti addaan ti bukodna a kandidata a nakisalip iti nasao a pageant. Kas met ti gagangay a national ken international beauty pageant, inpakita dagitoy a babbalasang ti bukodda a kinapintas ken kinasaririt, dua a talugading a rumbeng nga ikutan ti maysa a kandidata tapno mangabak a kas Miss Ilocos Norte 2017.

Nalabit nakilatis dagiti madaydayao ken respetado nga Hurado nga adda ken ni Balasang iti Paoay ti nasao a talugading.

ayta ti kangrunaan a rason a nagmayorya ti botosda para kenkuana, malaksid pay ti nagadu a nag “Likes” iti online voting pabor ken ni Dianne. Uray pay dagiti taga-media ken dagiti tattao a nagbuya idiay Arena ket nadlaw a ni Miss Paoay iti paboritoda apagrugi pay laeng ti kumpetisyon.

Haan maikkat nga adda latta dagiti negatibo a reaksyon gapu ta dandani nagkibaltang ti panagsungbat ni Miss Paoay idi Question and Answer portion. Dagiti intelihente nga agpalpaliiw, medyo ngimmato ti kidayda. Ngem ti desisyon dagiti Hurado ti nagpannuray a pinal. Naibalangat ngarud ti korona kenni Dianne a kas kabarbaro a Miss Ilocos Norte 2017.

Kadagiti naabak, haan kay maup-upay ken maawanan ti namnama. Maki-salip kayto manen. Kasta ti salisal, adda mangabak, adda maabak.#

Date Published: May 15-21, 2017

Photo by Alaric Yanos/PGIN-CMO