KINA-IGNORANTE

(ILUKO VERSION) Nalabit nakapungtot ni DENR Secretary Roy Cimatu a kaprobinsyaantayo idi nakitana iti video babaen ti social media ken TV broadcast seknan iti maipagarup a panaka-abusar ti maysa a protected species nga ikan a Hammerhead Shark wenno Pating a natiliw ti maysa a mangngalap idiay taaw iti Currimao, Ilocos Norte itay kallabes.

Imbes a na-isurrender iti awtoridad ti maipagarup a masaksakit a Hammerhead Shark, impanda ketdi iti takdang a binuybuya dagiti tattao. Adda pay nakasinelas a nangkusay ti agkulkulipagpag a Pating. Adda nangi-video. Kalpasanna, inpostna iti social media.

Ti makadakes la unay, maysa a ngongo nga agtutubo a minor de edad ti masuspetsa a nangparti iti nasa-o a Pating gapu iti rason a sayangenda ti karnena. Kayatna a sawen, nagraramanan dagiti nayat a nagsida.

Ti pammilin ni Secretary Cimatu, madusa a mabalud ken mamulta dagiti naglabsing iti linteg gapu ta maikanniwas ti inaramidda. Segurado a nagtigerger ti danag ken buteng dagiti maseknan gapu ti pammilin ti retirado a general iti Armada.

Ti kwestyon ita, nanumo laeng piman iti panagbiag dagiti maseknan a mangngalap. No mabaludda, awanen ti mangisakad ti pamiliada. Ti depensada, kina-ignorante ti paglintegan iti gobyerno isu’t gapuna a dimmawatda ti pammakawan iti nagbasolanda. Ngem ti linteg, haanna pulos a bigbigen dayta a pagrason a kina-ignorante.

Ditoy a nagpannuray ti asi. Irupruper ni provincial fishery regulatory officer Arthur Valente a madusa laengen dagiti nagbasol babaen ti Municipal Ordinance on Fishing Regulation iti Currimao ta nalaglag-an ti multa ken panakabalud kumpara ti National Wildlife Protection Law a nadadagsen amang ti pannusa a multa ken panakabalud nga ipatawna.#