Pagarupen ti kaaduan nga umili a naplantsa aminen a kolkol iti US $40 million Solar energy project dita ili ti Currimao, Ilocos Norte kalpasan a nagpipinnirman dagiti maseknan a partidos a kas ti local government unit ti Currimao, DENR ken ti kompania a Soleq Philippines, Inc.
Segun ti kaudian a damag daytoy a lawas, timpuar iti eksena ti Coalition to Save Trees nga idauluan ni environmentalist Shermon Cruz a mangkonkontra iti panakapukan ti 600 a natataenganen a kaykayo idiay Barangays Bimmanga ken Paguludan Salindeg dita Currimao a pakaipasdekanto ti nasa-o a solar project. Nadagsen dagiti balikas ni Apo Cruz agsipud ta inyarigna a “massacre of trees” no ituloyda a ragup a pukanen dagita a nalalayog a kaykayo pakairamanen dagiti duduoganen ken baak a pinuon.
Kinuna ni Bokal Joel Garcia nga insigasing idi ni Gob. Imee Marcos a no mabalin koma ket 300 laeng a kaykayo ti mapukan. Ngem natangken ti pagtaktakderan ti grupo ni Cruz nga uray no maysa laeng a kapuon ti kayo ket di rumbeng a maisakripisio para ti solar project. Makuna a burik-puro a saan ketdi a sinsinan nga environmentalists ti grupo ni Cruz ta ibilangda a kasla balitok ken diamante ti kinapateg ken kinabalor ti maysa a poon ti kayo.
Rumbeng kadi a patgan ti gobernador ti kiddaw ti grupo ni Cruz nga adda koma sabali pay a public hearing a maisayangkat tapno matratar a nalaing daytoy a problema? Ngem no kas pagarigan paayen ti gobernador ti nasa-o a kiddaw, ania ngata ti tignay nga aramiden ti grupo ni Shermon Cruz?
Napardas ti panagtulid ti aldaw. Nai-report ti media nga namarka-anen ti numero dagiti pinoon ti kayo a nasentensianen a mapukan. Apaman a nagungor dagiti chain saw ken agkanalpaak dagiti wasay, sinialesen nga umayen ti Armageddon dagitoy 600 a pinoon ti kayo dita kabakiran ti Currimao. #
