October 17-23, 2016
Agsasaruno manen ti bagyo a simmmangbay ditoy luglugar tayo nga entero nga Amianan a nangparnuay ti adu a didigra. Kapanpanaw ti nadamsak a Bagyo Lawin.
Tinawen tawen nga adu a bagyo ti napasamak a napasarantayo. Paseten ti panagbiang ti kalamidad a nakaparsuaan. Ti yuumay iti bagyo ket mapakadaan babaen ti weather forecast ti Pagasa nga ahensia iti gobierno. Maiduma ti ginggined ken uram ta killaat lattan no sumangbay.
Agyamantayo iti Ilocos Norte PDRRMC (Provincial Disaster Risk Reduction and Management Council) ken ti sangana ti syudad iti Laoag ken Batac ken kadagiti 21 nga ili gapu ti alibtakda a nagplano, nagsagana ken nangipakat kadagiti nasken a wagas a nakaispalan ti biag dagiti umili a biktima iti kalamidad.
Sakbay ti kalamidad ken uray pay idi kangitingitan ni Bagyo Lawin, dakkel a sakripisyu ti inpamatmat dagiti mamaingel a kameng iti DRRMC lokal nangnangruna ti biang iti mass evacuation, relief assistance ken clearing operation.
Saludo kami kadakayo appo a taga DRRMC lokal. Dakayo dagiti ibilang mi a baro a bannuar iti kagimongan! #
