Naggibusen ti tensyon idiay munisipio iti Marcos, Ilocos Norte. Sipud idi Huebes, Marso 31, 2016, nakaangesen ti nalukay ken addan kappia ti panpanunot dagiti empleados ken umili. Ngamin, addan ti ur-urayenda a DILG order a nangbigbig ken ni Salvador Pillos a kas lehitimo a mayor iti Marcos town.
Saluduanmi ni napalisi a mayor Arsenio Agustin ta natakderanna ti karina a boluntario a bumaba iti turay apaman nga addan ti nasa-o a DILG order. Kasta koma amin ti lider, adda “word of honor” da a kas kuna iti Ingles.
Pinagsapata itay nabiit ti Comelec central office idiay Manila ni Salvador Pillos a kas nangabak iti kina-mayor idi 2013 eleksion. Naaramid daytoy kalpasan a natakkuatan a diskualipikado ni Agustin a kandidato a para mayor idi 2013 eleksion gapu ti isyu iti American citizenship.
Iti naglabas a sumagmamano nga aldaw, naulaw dagiti empleados ken umili iti nasa-o nga ili agsipud ta dua metten ti nakatugaw a mayor da. Gapu ti tensyon, narway a kameng iti kapolisan ti nagbantay idiay munisipio.
Kas neutral a tropa iti gobierno, inannong ti Philippine National Police ditoy Ilocos Norte nga idadauluan ni OIC provincial director S/S Jose Melencio Nartatez Jr. ti nang-kontrol iti linak ken talna bayat ti nairteng a situasion idiay munisipio. Iti mission da: Ti bumalla-et ken aganawa no en-kaso a rumsua ti riribok gapu ti binnara a parnuayen dagiti paspasurot iti agsinnumbangir a partido.
Para kenni Apo Pillos, adda pay nabatbati a tallo bulan a panagserbina a kas mayor iti Marcos town aginggat Hunio 30. Iti biang ni Apo Agustin, agawaam ti agkampania para mayor manen bareng makapagsublika iti tronom. Kasta met kenni Apo Pillos, igaedmo ti agkalap ti adu a botos para bise-mayor bareng sikanto ti baro a mangidaulo ti Sangguniang Bayan iti iliyo.#
