Maitabon inton Septembre 18, 2016 ti bangkay ni nag-Presidente Ferdinand Edralin Marcos idiay Libingan ng mga Bayani, Taguig City, Metro Manila kalpasan ti naunday a panawen a panakapreserbarna iti temporario a lungonna idiay Marcos mausoleum, Batac City, Ilocos Norte.
Nagturay ti lima a pangulo iti Pilipinas a kas kada Cory Aquino, Fidel Ramos, Joseph Estrada, Gloria Arroyo ken Benigno Aquino III ngem awan kadakuada ti nangipalubos a maidulin ti bangkay ni Apo Marcos idiay Libingan ng mga Bayani. Ngem ita ta agturay ni Presidente Rodrigo Roa Duterte, natibker ti desisionna a mangipalubos ti panakaiponpon ti bangkay ni Apo Marcos idiay Libingan. Iti rason: Ni Apo Marcos ket nag-presidente iti Republika iti Pilipinas ken soldado a nakiranget kadagidi kabusor nga armada iti Hapon idi Maika-dua a Gubat iti Sangalubongan.
Maragsakan dagiti pamilia Marcos ken narway a Marcos loyalists iti daytoy nga desision ni Apo Duterte. Daytoy ngamin ti maysa kadagiti inkarina kadagiti umili idi tiempo iti kampania kadagiti sapasap a botantes iti eleksion 2016. Nasurok a 16 milyon a Pilipinos ti nagbitibit ken ni Duterte para kina-presidente.
Haan a maliklikan nga adda met dagiti mangsupiat ti Marcos burial idiay Libingan, partikular dagidi biktima iti Martial Law, agraman pamiliada ken papagayamda. Ti pagrasrasonda ket pasig a negatibo. Ditay maikkat nga adda latta dagiti maluksaw kontra kadagiti pamilia Marcoses. Babaen ti panag-protesta ken panangiyebkasda ti saksakit iti nakem, isu ngata ti pamuspusanda tapno maalay-ayan piman ti gurada kontra Marcos regime.
Ammoyo kadi nga uray ditoy bukodtay a probinsia iti Ilocos Norte ket adu met ti naarestar ken nabalbalud nga aktibista nga agtutubo idi tiempo iti Martial Law? Sumagmamano kadakuada ti pimmusayen gapu ti sakit. Dagiti dadduma, nag-immigrant dan idiay ballasiw taw. Natagari dagiti counterpart da idiay Metro Manila maipanggep ti Marcos burial isyu ngem isuda a pada nga Ilocanos a taga-Ilocos Norte ket naulimek ken naparbeng da.
Adda nabalitokan a pagsasa-o: “Aramid a maka-Dios no ammom ti mangpakawan ti basol iti kabusormo.”#
