INSURGENSYA

Pinulpullon a tawen ti parikut iti insurgensya komunismo ditoy pagiliantayo a Pilipinas ngem di met la masolbaren.

Rinibribon a biag ti imbuis iti agsinnumbangir a puersa dagiti agririnnupak a soldados iti gobierno ken dagiti rebelde a New People’s Army a panaka-armada ti Communist Party of the Philippines (CPP).

Makanningid a grupo ti CPP nga impasdek ni Jose Maria Sison alyas “Joma Sison”, nag-professor idiay University of the Philippines, mannurat, ken maysa a napeklan nga Ilocano. Inlunsadda Joma ken Kumander Dante ti puersa iti NPA idi tawen 1968, tiempo daydi Presidente Ferdinand Marcos.

Iti kallabes, adda rikos iti peace talk da Pangulo Duterte ken Joma Sison babaen ti peace panel of negotiators tapno matuldokan koman ti parikut iti insurgensya ditoy pagiliantayo ngem nagkibaltang gapu ti maipagarup a panagpalpak ti ceasefire a katulagan.

Nalidem latta ngarud ti banagen ti peace talk. No kasano ti kina-aktibo ti Puersa ti Armada iti Pilipinas kontra CPP-NPA ken kasta met ti biang dagiti rebelde.

Ita lawas, inbutaktak iti 81st Army Infantry Battalion ditoy Ilocos nga adda agarup 70 a natenneb a kameng iti NPA cadre manipud idiay Visayas ken Mindanao (VisMin) a naipatulod ditoy Luzon gapu’t pammatida a mas agresibo ti puersa iti CPP-NPA ditoy Luzon kumpara idiay VisMin. No cadre kunatayo isuda ti nasanay a grupo a mangisaknap ti doktrina iti rebulosyonaryo a partido.

Arapaap ti tunggal pada a Pilipino a matuldokan koman ti problema iti insurgensya ditoy pagilian. Asinno koma ti di mangayat iti pudpudno a nailian a linak ken kappia. Babaen ti bileg iti panagkarkararag kenni Apo Dios, magun-od tay koma dayta nga arapaap.#