Simbolismo ti gasat iti numero a sangapulo wenno numero 10. Iti nasantoan a Biblia, ti numero 10 ket naisurat iti namin 242 a beses. Iti Genesis 1, mabasa ti balikas nga “Ti Dios kinunana” iti namin sangapulo (10) a beses kas testimonia ti Mannakabalin a Bilegna a nangparsua ti lubong. Ni Apo Dios, inyetnagna para kadagiti tattao ti 10 a Nasantoan a Bilin (10 Commandments of God)……Ti simple nga ehemplo: Ti maysa a tao, naipasngay nga addaan ti 10 a ramramay iti ima ken 10 a ramramay iti dapan.
Dakami ditoy Ilocos Sentinel, sangapulo (10) ti bilangmi a kameng ti editorial staff base ti nailanad a nagnaganmi iti editorial staff box malaksid ti dua a legal consultants.
Iti daytoy Junio 19, 2015, isu ti aldaw ti Ilocos Sentinel’s 10th founding anniversary na a kas aglinawas a pagiwarnak iti Ilocandia ken kabangibang a probinsia ditoy Amianan. Iti unos ti maysa a dekada, nagserbi ti Sentinel a boses dagiti pada a narway nga Ilocanos. Nagserbi a linabag a nangisaknap ti damdamag tapno saan a maudi ti inpormasion dagiti kailiantayo. Ken kangrunaanna unay, inpaneknek daytoy a pagiwarnak ti kabaelanna a nangipablaak iti aglinawas dagiti abiso legal nga inparuk-at ti korte ken opisina ti local civil registry agraman dagiti ordinansa iti probinsia, syudad ken nadumaduma nga ili, kdpy. Tinarabayna met dagiti advertisers a nangpa-asenso ti negosioda gaputa immado ti customers da gapu ti advertisements da a naipablaak ditoy Ilocos Sentinel.
Adu’t pannubok a pinasaran ti Sentinel nanipud umuna a linabagna idi 2006. Kaasi ni Apo Dios, nalasatna amin a rigat, tuok ken sakripisio. Babaen ti natibker a pammati iti Namarsua, a buyogan ti anep, anos ken laing dagiti mangimatmaton, staff ken mannurat, nasubadan dagitoy ti nasam-it nga isem ken napalaus a ragsak gapu ti agdama a balligi a nagun-odna iti industria ti pagiwarnak.
Gapu ti di mabubos ken di makeltay a suportayo iti Ilocos Sentinel, namnamaenyo ti agtultuloy a panagserbimi kadakayo amin nga ipatpategmi a valued readers ken valued advertisers. Kasta pay, yebkasmi ti napalaus a panagyaman kadagiti nalalaing a mannurat ti PIA (Philippine Information agency), PGIN-CMO, Agserbi 24/7 ken amin a contributors ti press releases, Website ken Facebook photos manipud kadagiti nadumaduma nga LGUs, government agencies ken NGOs. Thank you all our Friends and more power! #
