Agsipud ta panawenen iti election period, nangrugin ti Comelec gun ban ditoy pagilian tayo kas panagsagsagana ti umadanin a panagbubutos–Eleksion Mayo 9, 2016. Nakurang a lima a bulan ti implementasyonna manipud Enero 10 aginggat Hunio 8, 2016. Napusgan ti Philippine National Police a tumulong ti Commission on Election a mangipakat ti nasa-o a gun ban ti entero a Pilipinas.
Kas pagannurotan nga inyetnag ti Comelec-PNP, maiparit kadagiti amin a sibilian ti agitugot iti ruar ti pagtaengan ti ania man a klasena a paltog ken dadduma pay a deadly weapons. Ngem adda dagiti sibilian ken government officials a mabalin nga exempted ket mabalinda ti agitogot ti armas no rummuarda ti pagtaengan gaputa nasken unay para ti sekuridadda. Comelec laeng ti makaited ti sertipiko a pammalubos.
Nagwaras ti Comelec-PNP checkpoints tapno nainget a maiyemplementar daytoy a gun ban. Gagem ti gobierno a maliklikan ti rumsua a bayolente a riribuk no tiempo ti eleksyon nangnangruna no nabara ti risiris dagiti politiko ken disipulosda iti maysa lugar.
Ngem adu latta ti natangken ti ulona a pulano. Ammoda a nadagsen ti pannusa ti agsalungasing ti gun ban. Adu ti baribar. Bahala na. Matiliw no matiliw, kunada.
Agbabawidan ngem nalpasen. Manglangit-langitdanton ti uneg iti rehas.
Agtungpaltay ngarud ti paglintegan kas natudyo nga umili.#
*Photo courtesy of INPPO