(Iluko version) Nabara a pagsasaritaan kadagitoy nga al-aldaw ti baro nga anunsyo ni US President Trump a panangwaswasna ti Obama programa a Deferred Action for Child Arrivals (DACA) a nangsalaknib kadagiti ubbing a gangganaet nga undocumented ti iseserrekda idiay America.
Segun ti Department of Foreign Affairs, 10,000 a Filipinos ti apektado ken mabalin a mapagawidda ditoy Pilipinas. Naruay a kakailiantayo nga Ilocanos ti maseknan kadaytoy nga isyu, ngamin, kaadduanna ditoy Ilocos ti adda nasinged a kakabagianna idiay Estados Unidos nangnangruna idiay Isla iti Hawaii.
Napusganen ti US Congress agingga’t Marso 5, 2018 a mangadal ken mangputar ti linteg a mangatipa wenno mangkanunong ti pammilin ni Trump a panaka-ideportar dagiti 800,000 nga apektado nga illegal entrants, 10,000 kadakuada ket Pinoys. Mano ngata met a pada nga Ilocanos ti agngangabit ti gasatna seknan toy nadangkok nga addang.
Ti maysa pay a nangdegdeg ti parikut ket iti kaadda ti baro a US Immigration policy a maiturong kadagiti Filipinos ken dadduma pay a gangganaet a nakaalan ti US citizenship-da a maipariten kadakuada ti mang-petisyon kadagiti amma, inna ken nasinged a kakabagian tapno agbalinda met a US citizens ken agnaed idiay America.
Di bumurong, adu nga arapaap ni Hawayano-to-be ti makiltay. Ket no kasta ti maaramid, Good Bye, America laengen! #
