Duduoganen ti dakkel a rangtay iti Laoag. Nasurok a lima a dekada ti kinadaannan. Iti imatang ti kaadduan, ditay madlaw nga agrupsan ti pundasionna. Ngem dagiti structural engineers iti Department of Public Works and Highways ti nagballaag nga agrukopen dagiti agduduma a paset iti Gilbert Bridge.
Rumbeng ngarud nga insigida a matarimaan ken mapatibker ti amin a partes iti nasa-o a rangtay tapno kasta maliklikan ti ania man a didigra a maparnuay kas koma bigla a marpuog, yad-adayo ni Apo Dios.
Nairugin ti panagtarimaan dagiti taga-DPWH kas ipasimudaag ti kaadda dagiti heavy equipment da iti sakaanan iti rangtay. Umuna a mapatibker dagiti konkreto a teddekna. Sumarunonto a mataming ti rabaw a paset iti rangtay. Segun kenni Engineer Nestor Pasion, hepe iti DPWH first district, agsinnubblat a maserraan ti agsinumbangir a “lane”. Umuna ti akin-daya a “lane” santu sumublat ti akin-laud a “lane”.
Segurado a bumper-to-bumper iti nairot a trapiko dita Gilbert Bridge apaman a maymaysanton a lane ti pagdaliasatan dagiti sumrek ken rummuar a luglugan ditoy Laoag nangnangruna no tiempo ti rush hours.
Kas traffic re-routing scheme, kinuna ni city traffic division chief SPO3 Sean Bagaoisan a maiparit to a dumaliasat dagiti dadakkel a truck dita Gilbert Bridge bayat ti rehabilitation work ti rabaw iti rangtay . Tinto alternatibo a rota nga agturong ti agpa-abagatan iti Manila Road ket iti agpa-daya dita barangays Rioeng ken San Mateo, Laoag City, sumrekda ti poblacion iti Sarrat ken dalliasatenda ti atiddog a Sarrat Bridge. Dagiti truck a mayat a sumrek ditoy sentro ti Laoag wenno agpa-amianan, agpa-dayada dita ili iti San Nicolas, aggingga a matuparda ti Sarrat Bridge.
Dakkel a perwiso ken taktak ti sagabaen dagiti motorista ken commuters kadagiti sumarsaruno nga aldaw. Ngarud, agan-anos tayo ken maawatantay koma iti situasyon. Di bumurong nga iti kamaudiananna, datayo nga umili ti aglak-am it imbag ken nam-ay apaman a mairingpas ti rehabilitation project iti Gilbert Bridge.#
