Fort ti baro a mangmanihir iti Plaza

editoryal

Fort ti baro a mangmanihir  iti Plaza

Published: November 14-20, 2016 issue

Ti Fort Ilocandia Resort Hotel iti kabarbaron a mangmanihir ti Plaza del Norte Hotel and Convention Center a kukua iti Provincial Government of Ilocos Norte kalpasan a saanen a napabaro pay ti nagngudon a kontrata iti 88 Green Group of Companies a nabayag bassit a nangupa ken nangtarawidwid ti nasao nga Plaza Hotel a masarakan dita Brgy. Balacad, Laoag City.

Segun ti report, impangato ti PGIN iti renta ti Plaza Hotel. Agarup P600,000 kada bulan ti dati nga upana. Ngem itan P1 million kada bulan. Nalabit immatras ti 88 Green firm gapu ta nadagsen ngata kada kuada ti naipangato a renta kada bulan.

Ti makadakes, adu’t agririri nga empleados da a naikkat gaputa di pay nabayadan ti separation pay da ken dadduma a benepisyo. Nasaem a panunoten ta adu manen a kakailian tayo iti naawanan ti trabaho.

Gagangay a karbengan ti Fort Ilocandia a kas baro a management ti mangiplastar iti bukodna a kayat nga empleados. Sapay koma ta addanto met laeng magasatan a ma re-hired iti biang dagiti na terminate nga empleados.

Apay a kinayat ti Fort Ilocandia a tarawidwidan ken inigosyo ti Plaza Hotel? Nalabit gapu ta naglukat manen ti regular a biahe iti China Airlines ditoy Laoag City. Mapattapatta nga adu a turista manipud China iti agpasiar ditoy Ilocos kadagiti sumungsungad nga aldaw.

Dagiti hotels a pagtarosan dagiti turista ti gumanansya iti dakkel a  pirak. No agpasiar dagiti turista, adu met a pagnegosyuan ditoy luglugar tayo iti mairanud a kumita iti kuarta dagiti bisbisita a gangganaet. Kayatna a sawen, tunggal maysa, naragsak no adda panagrang-ay iti panagbiag.#