Date published: April 24-30, 2017
FIESTA
No tiempo iti kalgaw, isu met ti tiempo iti panagfiesta dagiti nagduduma a lugar ditoy Pilipinas. Haan tay a paudi ditoy Ilocos Norte. Malaksid kadagiti sumagmamano nga ili ditoy Norte, kaadduanna a munisipalidad uray pay dagiti barbarangay ket agfiestada no tiempo ti kalgaw wenno Summer iti Ingles.
Nagbalinen a paset ti kultura ken tradisyon tayo a Pilipino ti mangselebrar ti fiesta. Natawid tayo kadagiti appo nga Espanol a nangyeg ti Kristianismo ditoy pagilian bayat ti panangngaywanda ti isla Pilipinas ti unos iti 300 a tawen.
No haan a naiyam-ammo ti Kristianismo ditoy pagilian idi ugma babaen ti pagilian nga Espana nga imbagian ni navigator Ferdinand Magellan ken dagiti soldadosna pakairamanan dagiti missionaryos a Katoliko, nalabit tinawid tayo koma ti pammati a Pagano, Islam, Budismo, Hinduwismo ken dadduma pay a kadaanan a relihion ditoy Asia. Dagiti kaadduan a taga-Mindanao nga inturayan dagiti Sultan, nagtalinaed ti pammati a Moslem agingga iti agdama a kaputotanda. Ngem ditoy Luzon ken Visayas, dominado dagiti Kristianos. No haan koma a naiyeg ti Kristianismo ditoy pagilian babaen kadagidi missionaryo a gangganaet a taga-Spain, nalabit sabali koma ti nagnagan ken apelyido ti tattao ditoy. Adayo koma a “Spanish surnames”, ad-adda koma a nagan ken apelyido dagiti tribu wenno katutubo, a balikas iti Tagalog.
Ti fiesta naisentro ti panangrambak ti patron saint a maysa laeng koma nga aldaw. Ngem saan metten ita a moderno a tiempo. Adda makalawas, adda pay makabulan nga inawaganda ti festival. Pangkomersyo payen. Sabsabalin ti tiempo. Kayattay man wenno haan, sumurot ti tadek iti kabarruanan. Ti nasken, natibker ken natarnaw latta ti pammati tayo ken ni Apo Dios nga agnanayon a mangtartarabay kadatayo a pinarsuana nga Annakna ditoy lubong.#
