Naruay a pada a konsumers ti mangkontra ti agdama nga eksperimento ti Ilocos Norte Electric Cooperative maipanggep ti baro a sistema a panagbayadan ti electric bills. Ti dati, mabalinmon ti agbayad insigida ti konsumom iti koryente no umay ni Apo meter-reader/bill collector dita pagtaengam wenno pasdek negosiom.
Ngem itan, saanen. Masapul nga inka agbayad ti bills mo kadagiti naituding a Bayad Centers ditoy syudad wenno poblasion ti ili kas koma dita Savemore, Western Union ken dadduma pay a business outlets dita lugaryo. Adda pay bayadam a sabali a lima a pisos a kas service fee tunggal agbayadka ti bills mo kas agpatak iti resibo nga awatem.
Nayon nga istorbo, taktak ken gastos ti plete wenno gasolina no adda luganmo ti parnuayen daytoy a sistema. No masulit ka nga agpa-sentro wenno agpa-ili, itantan mo ti agbayad. No naliputan ka ti due date, adda surcharge. Bale agsublitayo kadaydi kadaanan a sistema ti panagbayadan ti bills. Segun ken ni INEC board president Rey Lazo, eksperimento laeng kano daytoy ngamin problema ti INEC management dagiti dakes nga aramid ti dadduma a meter-readers/bill collectors (pwera de los buenos) a saan mangiyapunte wenno mangi-remit kadagiti cash collections da.
Kas man la narabaw daytoy a rason. Dakkel ti pammatimi nga ad-adu pay laeng ti bilang dagiti honest bill collectors ngem dagiti rinuker. Ti ikkis ti kaadduan: Ibasura ti nasa-o nga eksperimento ket isubli daydi dati a sistema ti panagbayadan ti electric bills! Kas tay dati: Ag-meter reading ni Apo INEC collector, pindutenna tay gadgetna, rummuar tay statement of bills, no adda kuartamon agbayadkan. Awan ti adu a sinsa-o kalpasan nga inawatmon ti resibom. Kasta ti epektibo ken napartak a sistema.#(jun ramos guiang)
