Eksamen ti kina-abogasia, permi a narigat

Impablaakken ti Korte Suprema idi Mayo 3 ti resulta iti 2015 Bar Examination a naaramid idi napalabas a Nobiembre. Ditoy Ilocos Norte, tallo a taga Mariano Marcos State University, Batac City ti nakapasa, dua met ti taga Northwestern University, Laoag City ti nakaruar ti nasa-o nga eksamen iti kina-abogasia. Adda pay dagiti taga-Ilocos Norte a nagturpos ti sabsabali nga unibersidad wenno kolehio a nakaruar met ti Bar exams.

Narigat ti eksamen, nangnangruna ti Remedial Law, kinuna dagiti examinees. Agdagup iti 1,731 a graduado iti abogasia ti nakapasa kadagiti nasurok nga 6,600 nga examinees, segun ti Korte Suprema. Nalabit, permi a nausar ti utek ken abilidad a wagas a nangsubat kadagiti saludsod legal bayat ti eksamen. Adda pay damag a sumagmamano kadakuada ti piman immatras ti kangitingitan iti eksamen gapu ti pannakaupay ken bannog mental bayat ti uppat a domingo nga eksamen idi napalabas a Nobiembre.

No narway man ti di nakapasa, ipatigmaanmi kadakuada a haan da koma maawanan ti namnama. Adu ti ammotayo a nagbalin nga abogado a dimmalan ti adu a pannubok. Adda da pay dagiti namindua ken namitlo a nageksamen. Kamaudiananna, kaasi ni Apo Dios, babaen ti regget ken panagkarkararag, nagun-odda ti arapaap a nagbalin nga abogado. Iti agdama napintas ti annayas iti panag-praktisda iti abogasia. Dagiti dadduma nagbalin da nga hepe ti sangay iti gobierno wenno legal dapartment kadagiti bangko.

Kadagiti nagasat a kabarbaro nga abogado, yebkasmi ti nabara ken naimpapusuan a kablaaw dakay amin!#