Droga

734540_1699427143627494_6012032999159463654_nInsurhensia (dagiti makannigid a kakailiantayo) ti kangrunaan a parikut iti gobierno ditoy Ilocos Norte idi dekada ‘70 aginggat dekada ‘90. Nagbaliw ti pul-oy ti angin. Illegal a droga ti simmublat a problema ti kagimongan. Di mailibak a permi nga agraira ti panagwaras ti maiparit nga agas a kas shabu ken marijuana a mangdadael ti salun-at ti tao nangnangruna dagiti agtutubo.

Itay nabiit, unos ti makalawas laeng 134 gramo a droga nga agbalor ti P809,984 ti nakumpiskar ti polisia ditoy Ilocos Norte. Napinget ti kampania kontra droga nga isaysayangkat ti Philippine National Police ditoy luglugartayo. Saludarantayo ida gapu ti anep ken karadkadda a mangipatpatungpal iti nasa-o nga anti-drug campaign.

Numan pay kasta, di met agparbeng dagiti drug dealers ken drogista. Ammoda a basol a kriminal ti aglako ti droga ngem ala latta tapno adda pirak a pangbiagda ti pamiliada wenno pangmentenar ti bisioda. Kinakurapay ti maysa a rason no apay a sirkenda ti ania man a klase ti pagkakuartaan. Kaptenda uray natadem a banag. Ti pagsasa-o iti Tagalog: “Kapit sa patalim”.

Segun ti rekord iti Ilocos Norte Provincial Jail, ginasot dagiti balud dita karsel, kaadduanna kadakuada droga ti sangsangguenda a kaso kriminal. No dida malusotan ti kasoda dita korte, agtungpalda a mabalud idiay New Bilibid Prison, Muntinlupa, Rizal.#