Iti entero a pagiliantayo, rinib-ribon ti simmuko a personalidad gapu ti illegal a droga. Narwayen ti natiliw. Ti nakas-ang, adun ti napapatay gapu ta maipagarup a nakipag-enkuentroda kadagiti operatiba iti polisia. Agtultuloy ti panagbilang tunggal aldaw seknan ti dagup dagiti boluntaryo a dimmatag, nakemmeg ken napasag. Inkeddeng ti gobierno Duterte a paksiatenna ti parikut iti droga ti unos ti umuna a tallo a bulan agingga innem a bulan.
Kayatna a sawen ti sumarsaruno nga aldaw ken bulan, narway pay a biag ti mairisang, narway pay a personalidad ti mapusasan bulonna maipisok ti karsel ken narway pay a drogista ti aglilinya nga agpresentar kada appo a mayor wenno hepe iti polisia sadanto agsapata nga saandon pulos a sublianan pay ti illegal a droga.
Sakbay ti 1970s a nangrugi ti parikut iti illegal a droga ditoy Pilipinas. Idi 1973, tiempo iti Marcos era’s Martial Law na-firing squad idiay Fort Bonifacio, Quezon City daydi agdindinamag a notoryos a Chinese druglord Lim Seng. In-inot a kimmaro ti problema iti illegal a droga idi panawen da Presidents Cory Aquino, Fidel Ramos, Joseph Estrada, Gloria Arroyo ken Pnoy Aquino.
Kadaydi a tiempo sakbay ti 1970s ditoy bukod tayo a probinsia ti Ilocos Norte, di pay unay nalatak ti makunkuna a “shabu” not di ket “marijuana” ti paggugusto dagidi agap-apiang. No adda aglatak idi nga apiangngero iti komunidad, karimon ken umsien isuna dagiti umili. Ibilangda isuna a “social outcast”.
Sapay koma ta agballigi ni Pangulo Duterte a mangparmek a mapinpinsan ti parikut iti illegal a droga ditoy pagiliantayo. Ti adatna, tuma-od ti adu a reklamo a human rights violations kontra kenkuana ken dagiti disipulosna iti biang ti kapolisan. Dayta ti nagasang a gunggona iti limmandok a gemgem a simbolo iti panagturay ni Apo Digong Duterte. No isu la ketdi ti makapugipog ti daytoy a sarot iti kagimongan, apay ditay pabus-oyan. La ketdi maiyannatop ti linteg iti tao ken ti linteg iti Dios.#
