Di met maaros ti pintas ni balasang Ilocana

Agdagup ti 40 a babbaro manipud ti nagduduma a pagilian iti lubong pakairamanan ti bukodtay a Pilipinas ti simmangbay ditoy probinsia nga Ilocos Norte. Isuda dagiti kakandidatos para ti salip iti Mr. International 2015. Nagasat ti Ilocos Norte ta isu ti napili a probinsia a nangsanga-ili kadakuada para ti salisal iti pre-costume parade a naangay dita Centennial Arena, Laoag City idi Nob. 23, 2015. Ti pinal a salisal ket maangay idiay Manila nga isunto ti pakaammuan no asino kadakuada ti mapili nga agbalin a Mr. International 2015. Ni Neil Perez, kadaraantay a Filipino ken maysa a kameng ti polisia (PNP) iti nangabak a kas Mr. International itay kallabes a tawen 2014.

Babaen ti panangmatmatmo kadagitoy a babbaro, makalatismo ti taktakderda: Nataraki, natayag, nabasked a pammagi, macho, bagets nga bagets a panagar-arwat ken dadduma pay a talugading iti tumutop nga agbalin a Mister International 2015. Di pay mailaksid ti tulagading a kinasirib, di-adal, integridad, kina-responsible, maka-Dios ken dadduma pay a pagwadan a galad. Amin dagitoy, adda dakkel a puntos nga ikonsederar dagiti hurados iti salip. Naangay ngarud idi Nob. 23 ditoy ti nasa-o a pre-costume parade tapno makilatis no kasano a maitag-ay dagitoy a kakandidatos iti Mr. International ti kultura ken kannawidan dagiti bukodda a pagilian babaen ti simbolismo a kawes ken ramramit.

Di dakes no agarapaaptayo nga adda koma met pada nga Ilocano nga agbalinto met a Mr. International iti masungsungad nga aldaw wenno tiempo. Nalabit adda dagiti nalimed a kualipikado ditoy probinsia tayo ngem nakurang la ngamin ti exposure da iti publiko. Kasta met iti biang dagiti babbai. Di met maaros ni balasang Ilocana no pintas, lasbang ken kinasirib ti pagsasaritaan. Maysa ngarud a karit kadakuada ti salip iti nasional ken international beauty pageant ta saan laeng koma nga agpatinggada iti city ken provincial level.#