Naipasulin piman idiay Kongreso ti gakat kontra daynastiya politikal (anti-political dynasty bill). No koma nagballigi, haan met nga insigida a maipakat iti daytoy 2016 eleksyon ngem ketdi iti sumarsaruno a panagpipili. (Purawton ti maris iti uwak no maaramid dayta). Natratar ti gakat idiay Kamara ngem haan a dimmur-as gapu ti kaawan iti panangkanunong ti kaaduan a kongresista. Arigna kiniltayda ti biag iti nasa-o a gakat sakbay nga agandap koman ti bituenna.
Simple laeng ti rason. No kas pagarigan inaprobaranda koma ti gakat, arigna nangpidotda ti bato sada intuktok iti ulona. Ngamin ti maapektaran ket isu dagiti kamkameng ken nasinged a kakabagian iti pamiliada nga agkalikagum met nga agbalin a politiko iti luglugarda.
Adda met ketdi idiay linabag ti Konstitusyon iti pagiliantayo a Pilipinas a maiparit ti daynastiya politikal ngem “tuppol” ta awan met ti “implementing rules” a masurot koma. Dayta ti rason a naipila idiay Kongreso ti nasa-o a gakat kontra daynastiya politikal (anti-political dynasty bill). Daksanggasat ta naupay dagiti mangnamnama a kakailiantayo. Numan pay kasta, adu latta met dagiti umili nga awan ti sakit iti bakrangda no agpapamilia ken agkakabagian dagiti mangituray kadakuada.
Ditoy Amianan a Luzon, kas gagangay, pampamilia ken agkakabagian dagiti nalatag, nabibileg ken mamaingel a politiko ti agkakandidato a papili inton 2016 eleksyon. Segun kadakuada, bugbugtong ti gagemda: Ti agserbi a natarnaw kadagiti amin nga umili.#
