Dagiti risgo iti dalan

Nakaam-ames ti napagteng ni Rodolfo Farinas Jr., baro ni Diputado Rudy Farinas (lst district, Ilocos Norte). Pimmusay ni JR itay nabiit gapu ti aksidente (parbangon) idiay national highway iti Bacarra, Ilocos Norte. Naaksidente ti motorsiklona idi maipagarop a nag-sudden stop ti truck a sarsarunuenna bulonna a na-slide ket timmama isuna iti concrete barrier, segun ti report.

Ti saludsod mainaig ti nasa-o a disgrasia: Adda ngata tail light iti truck? Adda ngata break light iti truck?

Naitukit dagitoy a saludsod agsipud ta ti kaawan ti tail light, break light ken signal light dagiti luglugan ti masansan a makaigapu ti adu a disgrasia iti daldalan, nangnangruna kadagiti national highways. Delikado pay dagiti bolding ti headlight na a behikulo wenno motorsiklo nga awan pulos silawna a masabatmo iti rabii. Kasta pay a delikado dagiti awanan reflectorized ti likodna a kuliglig, kurongkurong ken kalesa.

Adda agdama a paglintegan nasional mainaig kadagiti nasa-o a banag ti luglugan ngem nakurang ti pannakaipakatna. Gapu kadaytoy, tumulong koma dagiti appo a polisia a mangiyemplentar ti linteg. Adda dagiti police checkpoints ngem madlaw a ti konsentrasionda ket ti illegal a droga, armas, kaawan ti driver’s license, kaawan ti registration iti lugan ken kaawan ti crash helmet.#