Pormal a nainbitaran dagiti kokonsehales iti Laoag City nga agatendar ti session iti Sangguniang Panglalawigan iti Ilocos Norte nga idauloan ni Bise Gobernador Angelo Marcos Barba. Ti agenda: Panggep iti alegasyon a panagpukaw ti mapattapatta a P90 milyon a pondo iti gobierno lokal iti Laoag City. Nagimbestigaren ti Commission on Audit ken Bureau of Local Government Finance.
Gapu ta component city ti Laoag ti salinong iti probinsya iti Ilocos Norte, adda karbengan ti Kapitolyo a mangusisa iti nasa-o a kaso. Dayta ti rason no pay a nagtignay ti Sangguniang Panglalawigan. Daksanggasat ta tallo laeng a kokonsehales iti Laoag ti dimmatag iti inbitasyon dagiti bobokales.
Adu a pada nga umili ti ngimmato ti kidayda. Ngamin ta ti timmabuno laeng ket isuda Councilors Roque Benjamin Ablan III, Handy Lao ken Justine Clarence Chua, pasig a bagito iti konseho iti Laoag. Kayatna a sawen nga alibtak dagitoy tallo nga agtutubo. Napigsa ti gagarda a mangsukisok kadagiti pannubok iti biag. Kayatda ti makaadal kadagiti nataengan nga agpanpanday ti linteg.
Nalabit adda pagrasrasonan dagiti kaadduan a kameng iti konseho iti Laoag no apay nga haanda a nagparang. Gapu kadaytoy, kinuna da Bokal Vicentito Lazo ken Bokal DaVinci Crisostomo, agpada nga abogado, a plano ti SP-Ilocos Norte ti mangisayangkat ti bukodna nga inquiry panggep ti nagpukaw a P90 milyon a pondo iti syudad.
No ti gagem ket para ti pagsayaatan dagiti pada a taxpayers iti Laoag, suportado dagiti umili. Ngem no adda maris politika dayta nga addang, agpasuli pay lang dagiti kaadduan a di mayat iti nasapa a panagpolpolitika. Ngem kas kameng iti prensa, akemmi ti mangsurot iti ania man nga imbestigasyon iti nasa-o nga anomaly.#
