Nagtubo a kasla u-ong a mannagado ti negosio a water refilling stations ditoy lugartayo ken iti entero a Pilipinas. Iti deppaarnat Laoag City, nalabon ti danum ti Ilocos Norte Water District (laksid no tiempo ti kalgaw) iti faucets a kumamang dagiti pagtaengan ken establismento a mabalin nga inumen wenno usaren a pagluto. Numan pay kasta, narwam metten dagiti kaadduan a tatta-o ti agorder wenno agsakada ti ginallon a danum nga inumen manipud kadagiti water refilling stations.
Makita iti inaldaw kadagiti kalkalsada dagiti naruay a kurong-kurong nga agedeliver kadagiti sukida ti ginalgallon a danum a naikarga ti plastik water containers. Expose-da ti kainitan, tapok ken tudo (no tiempo ti nepnep) gaput awan ti trapal a kalubda. Manmano dagiti water refilling stations nga addaan ti bukodna a delivery service multi-cabs. Makita nga aglitlitemen dagiti plastik containers gapu ti kinadaandan nga us-usaren dagiti refilling stations, pwera de los buenos.
Inruar ti media daytoy a parikut: Adda kano risgo wenno pangta iti salun-at ti tao dagiti main-inum a danum a naikarga kadagiti daanen a plastic water containers. Naibutaktak daytoy babaen iti interview kada Administrator Perry Martinez ti Laoag city government ken Dr. Allan Taylan, mabigbig a kameng ti Ilocos Norte Medical Society. Kunada a no nasagsag, nakumpit ken aglitlitem dagitoy plastic water containers, delikado iti salun-at ti tao a mangipa-uneg ti danum nga aggapu ditoy. Adu ti toxic chemicals a tumaod manipud kadagitoy a plastic containers nga over-exposed ti kainitan a mabalin a pakaaalan ti kanser ken sakit iti lalaem.
Ania ngarud ti tignay nga aramiden ti city government? Mabalin nga adda mandato a mang-regulate kadagitoy refilling stations. Mabalin a maobligarda a sukatan amin a daanen a plastic containers da. Nagastos daytoy isu a nalabit ipasada kadagiti consumers babaen ti panangingatoda ti agdama a presio ti danum tunggal container. Saan a bale no kasta ti maaramid. Ti nasken, masalakniban ti salun-at dagiti pada a consumers.#
