Adtoy ti simple a saludsod maiturong kadagiti kakandidato lokal ita ta di pay nadanunan ti March 26 a rugi ti opisial a kampania para lokal:
Ania ti gagem iti maysa a politiko a nangipaskilen kadagitoy nga al-aldaw ken naglabas nga aldaw iti publiko man wenno pribado a lugar dagiti tarpaulin-na a nakaimalditan ti rupana ken naganna?
Mabalin a dagiti suporters ni apo politiko ti mangirason: Dina met imbaga idiay tarpaulin-na a botosanyo isuna ti para kastoy a posision inton Mayo 9, 2016. No kablaaw laeng, awan kano dakesna.
Basar ti Comelec guidelines, awan sa met ketdi ti nasalungasing ni apo politiko a paglintegan iti eleksion code numan pay maiparit ti nasapa a panagkampania no dina pay tiempo, lokal man wenno nasional.
Nasariwawek ti panag-ut-otek dagiti appo a botantes. Kunada a makarawa ti pukol dagiti rason. Nalawa kano ti lubong a pagkautan ti rason.
Gapu ta limitado ti espasio para argumento, ibagatayo lattan a dagiti appo a botantes ti supremo inton madanonan ti naindaklan nga aldaw iti panagpipili ta isuda ti agbotos kadagiti namnamaenda a politiko a rumbeng a sumaruno nga agturay ti pagilian, probinsia, syudad ken ili ditoy republika iti Pilipinas.#
