October 31-November 6, 2016 issue
Naiparangen iti publiko ti kallikkis a monument iti rebolutionaryo a Pilipino heneral a ni apo Antonio Luna a naipasdek iti sangnguanan ti Luna shrine idiay Badoc, Ilocos Norte bayat ti panakaselebrar ti 150th birth anniversary na idi Sabado, Oct. 29, 2016.
Naiyabay ti monument na iti agdama nga istattua iti kabsat na a ni Juan Luna, katatan-okan a pintor idi panawen dagiti Espanol. Agserbi ti monummentoda a kas baton lagip ti kinabannuar da nga agkabsat. Paset da kadagiti mamaingel nga Ilocanos a rebolutionaryos a nangkontra kadagidi gangganaet a nangsakop iti pagiliantayo a Pilipinas.
Babaen ti nasao a naispantar nga istattuada, agnanayon to latta a silalagip ti kinabannuar da iti isip ken puso dagiti pada a Pilipino, nangnangruna kadagiti agtutubo iti agdama ken sumarsaruno a kaputotan. Gapu ti gimmal-ayab a kina-patriotismo, inlaban da ti pakagun-od ti wayawaya tapno maruk-atan tayo manipud ti kawari ti kolonialismo.
Bayat ti selebrasyon idi Sabado, nagbitla met ni Gobernadora Imee Marcos ket inyebkas na ti siddaaw no apay a nakaiyanak daydi inada a Badocquena ti dua nga ekstra-ordinaryo nga ubbing a timmanor a natan-ok ken bannuar iti sangkalian.#
