Nasam-it a denggen ti rakurak a bimmassiten ti bilang dagiti napopobre a pamilia ditoy Ilocos Norte. Nagsuek kano iti 8.4 porsiento manipud 28 porsiento ti nagbabaan dagiti dagup iti nakukurapay ti tawen 2010-2015. Ni mismo a Gobernadora Imee Marcos ti nangibutaktak daytoy a report bayat ti panagbitlana ti unos iti 61 minutos. Mainaig daytoy ti 5th State of the Province Address (SOPA) ni Manang Imee a naangay dita Centennial Arena, Laoag City idi Agosto 10.
Adu dagiti kakailiantayo ti nasariwawek iti panagpanpanunotda. Kasla agduaduada iti nasa-o a pigura a nagsuek ti bilang dagiti nakukurapay ditoy Ilocos Norte. Kasla kayatda a makita ti pammaneknek nga adun a pamilia ti naiyaon ti rigat pinansial. Saludsodda: Bimmassit kadin ti bilang dagiti agdildildil piman iti asin iti dulang ken nalabonen kadin dagiti taraonda a maidasar iti panganan? Kunada a dagiti laeng pamilia iti Overseas Filipino Workers (OFWs) ti nakarikna ti yuongar iti lasag ta adu a pirak ti maipawpaw-it para pamiliada ditoy Pilipinas manipud ballasiw taaw. Ditay supringen no dayta ti paniriganda. Karbenganda ti mangiyebkas iti bukodna a kapanunotan.
Sapay koma ta saan nagbiddot ti ahensia iti gobierno a nangted ken ni Manang Imee ti pigura wenno statistehia ti bilang iti porsiento dagiti nakukurapay a pamilia ditoy probinsya. Mamati kami a nasisirib met dagitoy statisticians ti maseknan nga ahensia iti gobierno. Nalabit nagtrabahoda nga husto tapno makuentada ti eksakto a porsiento iti bilang dagiti pamilia a limmung-aw ken imasenso ti panagbiagda. No addaanda la ketdi ti kongkreto nga ebidensya mainaig kadaytoy a banag, di bumurong a di maigawidan dagiti kritiko ti agtung-ed ken agpalakpak.#
