Barrio doktor iti masakbayan

Ti haan unay mabayag a tiempo, mapattapatta nga adunton ti doktor wenno mangngagas nga agserbi kadagiti nadumaduma a barangay nangnangruna kadagiti nasulinek a lugar ditoy probinsya. Tay makunkuna a Barrio Doktor.

Daytoy ti masirmata pakaseknan ti panakatagiben ti salun-at dagiti umili nga agnaed iti aw-away. Haan a mailibak nga adu kadagiti nakukurapay a kakailian a masaksakit dita lengleng a lugar a dida piman mapadasan ti agpa-doktor agsipud ti kinarigat iti panagbiag ta awan pay piman pagpleteda nga agpa-ili tapno agpaagas. Kas alternatibo, agpaagasda iti arbularyo a tapal tapal.

Parikut ngamin ti kinakurang ti doktor a mayat nga agserbi a kas Barrio Doktor gapu ti adu a rason kangrunaanna ti kinababa iti sueldo ken benepisyo. No nagadal isuna ti kinadoktor iti pribado nga onibersidad, gimmastos ti milyones a pirak. Gagangay a panunotenna ti agabbrot tapno makapaksubat kadagiti rigrigat dagiti nagannak kenkuana ken kasta metten para ti masakbayanna.

Mainaig daytoy, addan baro a gannuat ti gobierno nasional a mangted ti libre a matrikula wenno tuition fee kadagiti estudyante nga agadal ti kina-doktor.

Nagasat ti Mariano Marcos State University dita Batac City, Ilocos Norte ken ti University of Northern Philippines dita Vigan City, Ilocos Sur, agsipud ta duada kadagiti walo nga State Universities and Colleges (SUCs) ditoy pagilian a napili a mangidiaya ti libre a matrikula wenno tuition fee kadagiti ag-enroll ti College of Medicine a mangrugi iti daytoy nga school year 2017-2018. Nakaawaten itay nabiit ti MMSU College Medicine iti pondo nga agdagup ti P39.6 million para itoy a programa, segun kenni acting MMSU President Dr. Prima Fe R. Franco.

Nalabit a dagiti agbalinto a doktor nga agturpos babaen ti daytoy a program iti gobierno a libre a matrikula ket ma-obligardanto nga agserbi a kas Barrio Doktor. No mano a tawen ti panagserbida, ti gobierno iti mangngeddeng.#

Publication Issue: June 26-July 2, 2017