(Iluko version) Naburnok ti ayuda a moderno a ramramit a pagtalon ti naiwaras kadagiti nadumaduma a zanjeras ditoy Ilocos Norte. Napalaus ti ragsak dagiti appo a mannalon a lideres ken kameng ti zanjeras idi awatenda dagiti nasa-o nga ayuda.
Kas koma iti Umuna a Distrito, ni mismo a Diputado Rodolfo C. Fariñas, a binayabay ni balasangna Bokal Ria Fariñas kenni DA Regional Director Lucrecio Alviar Jr., ti personal a nangibunong ti agbalor P27 milyon a nagduduma a pasig a brand-new farm machinery ken equipment a mausar a pagtalon. Adda pay RIA (Rang-ay Iti Amin) e-tricycles ti naited kadagiti first district LGUs.
Ti Department of Agriculture iti Duterte administration ti nangpondo iti panakagatang kadagitoy a ramramit a kas koma ti farm tractors, water pumps, rice transplanter, multiple-purpose drying machines ken dadduma pay.
Nangiburay pay ti DA iti Segundo Distrito kadagiti umarngi met laeng a ramramit a pagtalon babaen ti panangibunong ni Gob. Imee Marcos.
Rumbeng la unay a maikkan ti importansya ti biang dagiti appo a mannalon tapno ad-adu ti mapataudda a produkto iti agrikultura. Isuda ti maysa kadagiti duri iti ekonomya.
No awan ti mannalon, awan ti produkto a taraon a magatang iti merkado. Uray no adu ti kuarta, no awan met magatang a taraon. Resulta: Agbisin piman ti tattao. Di tay koma ngarud ipalubos a kasta ti dakes a scenario a mapasamak.#
