Published date: March 6-12, 2017
ATLETA
No ti maysa a tao ket masa-o nga atleta, isuna ket addaan ti nakired, nabasked, naundor, naparagsit ken namasel a pammagi. Dagita a talugading adda kadagiti kaadduan nga atleta iti Ilocos Norte a nakisalip idiay kalleppas a DepEd Region 1 Athletic Association meet a naangay iti kabangibangtay a probinsya iti Ilocos Sur, partikular idiay ili iti Bantay a sentro ti dinnayo iti sports.
Apay ngarud a napaayda a nangipasubli ti kinakampionado a dati a tenggel ti Ilocos Norte ti namin-adu a nagsasaruno a tawen idi tiempo ni dati a Gintong Alay sports director ken nag-gobernador Michael Keon? No. 7 pay ketdi iti ranking iti Norte ita a tawen numan pay intag-ay ti elementary division team a nagbalin nga overall champion ti elementary level. Kasta met a No. 6 ti Laoag City ken No. 8 ti Batac City.
Kabayatanna, adtoy ti sungbat ni DepED-Ilocos Norte MAPEH Education Program Supervisor Gene Reginaldo ti saludsod no ania ti rason a naaros dagiti atleta iti Norte. Segun ti paliiwna, kinunana nga ab-ababa dagiti saka dagiti kaadduan nga atleta iti Norte kumapara iti saka dagiti atleta iti Pangasinan II a nagkampeon manen ita a tawen ti nagsaruno a gundaway.
Kas ehemplo ti benneg iti track and field, kinunana a no dua nga askaw dagiti tumataray iti taga-Norte, kaibatoganna ti maysa laeng nga askaw dagiti runners iti taga-Pangasinan II ken dadduma pay a top-ranking team gaputa at-atiddog ti sakada.
Iti ababa a panna-o, dakkel ti bentahe dagiti atleta nga atiddog ti sakada, sumursurot pay nga atiddog dagiti takiag, ima ken natatayagda.
Itan ta adda kasta a paliiw ni apo Reginaldo, rumbeng a saganaandan para ti sumaruno a R1AA meet inton umay a tawen. Ngarud, pilien ken sanayen dagiti atleta iti Norte nga addaan ti ala-Stallion a saka ken pammagi babaen ti pannarabay ti maysa a trainer nga addaan ti abilidad ken kinapasnek a kas kenni apo sportsman Keon. No kasta ti maaramid, segurado nga agakop dagiti atleta ti narway a medalya a balitok haan laeng nga ti benneg iti tinnarayan ngem iti amin a klase iti sports a pagsasalipan.#