Narigat ken nagastos ti mangmentener ti transmission lines iti elektrisidad a patpatarayen ti National Grid Corporation of the Philippines. Daytoy NGCP ket pribado a negosio a kabinnulig ti Ilocos Norte Electric Cooperative ken amin a kapada a kooperatiba iti elektrisidad ti entero a pagilian.
Itay nabiit, umapela ti NGCP kadagiti isu amin nga umili ditoy Ilocos region bayat ti presscon maipapan ti pannakasaluad dagiti materiales iti transmission lines da kontra ti pilferage wenno panakatakaw kadagitoy a ramramit iti transmission lines.
Nalabit, agraraira ti insidente a panagtatakaw kadagitoy a ramramit ti NGCP banag a nangiyetnag ti apela a saluadantay koma nga umili dagitoy a ramramit kontra birkog ti waya ken kable.
Metal ngamin dagitoy a waya ken kable. Isu a takawen dagiti birkog sada ilako kadagiti junk shops tapno a pagkakuartaanda. No matakaw dagitoy a ramramit, ania ti epektona? Bigla nga agpukawpukaw ti serbisio iti koryente kadagiti balbalay, pasdek negosio, pangopisinaan ken kalkalsada (no tiempo ti rabii).
Maapektaran ti isu amin. Uray pay ti balay diay nangbirkog ti kable ken kasta met didiay akin kukua ti junk shop a gimmatang kadadiay natakaw a ramramit, agsagaba met a maawanan ti supply ti koryente. No manon to nga oras a brownout, perdisyon latta.
Agridam tay ngarud, kakailian. Indengan tay ti apela iti NGCP para ti pagsayaatantay amin a sangapada.#
