DATE PUBLISHED: January 9-15, 2017
Kalpasan ti nasuroken nga innem a bulan nanipud idi Hunyo 2016 a panakatakuat iti maipagarup nga anomalya seknan ti panagpukaw iti riniwriwriw a pisos a pondo iti City Government iti Laoag babaen ti City Treasurer’s Office, awan pay paglawlawaganna aginggana kadagitoy nga al-aldaw.
Medyo nagmawmaw pay ketdin ti nasa-o nga isyu a dati a nabara a pagsasaritaan idi dagiti tattao nangnangruna dagiti taga-Laoag a maseknan la unay agsipud ta ti nasa-o a pondo a nakumbibiaw ket naggapu kadagiti buis a kuarta a nakolekta kadakuada.
Ngem ita a lawas, nairiing manen ti isyu iti nadakamat nga anomalya babaen ken ni abogado Vicentito “Toto” Lazo, kameng iti Sangguniang Panglalawigan iti Ilocos Norte. Adda padana a bokal a taga-Laoag ngem ni bokal Lazo ti napinget a mangsursurot ti kaso no anian ti pagdurdur-asan ti imbestigasyon.
Madlaw a naginad ti imbestigasyon. Gapu daytoy, idauluan ni Lazo ti panakaputar ti maysa a resolusyon maiturong ti opisina iti Commission on Audit tapno kiddawen ti SP-Ilocos Norte ti alisto a panakaparuk-at ti resulta iti imbestigasyon.
Agngata-ngata ngamin lattan dagiti tattao no ania iti kinapudno. Segun kenni Lazo, adda agkuna a P80 milyon, P90 milyon ken P120 milyon ti nagpukaw a pondo. Ania kadagitoy ti eksakto a gatad a nayawyaw? Asinno dagiti rumbeng a mapilaan iti kaso? Adu dagiti banag a rebbeng a masungbatan.
Dagiti taga-COA ti pangnamnamaan a mangibutaktak ti kinapudno. Uray no nagtammeng ni Madam Tesorera idiay ballasiw taaw, a kas naipadpadamag, saan a lapped tapno masukisok ti kinapudno iti kabiitan a panawen.
Masolbar man wenno saan, maysanton a negatibo a pakasaritaan a maimaldit ti historya iti kunniber ditoy Laoag City, Ilocos Norte a saanto pulos maumag iti agdama kasta pay iti sumarsaruno a panawen ken henerasyon.#
