Agsublikan Mayor Pambid

Namin-tallon a daras a nagsukatsukat ti mayor, simmursurot ti bise mayor, dita ili iti Marcos, Ilocos Norte toy agdama a tawen 2017. No di agkibaltang, mamin-uppatton kas pagarigan agsubli ni napalisi nga acting mayor Rofel Rosal Pambid a segun ti damag adda isuna idiay America nga agbabakasyon ti agdama.

Namungayan amin idi napapatay ni nakatugaw a mayor Arsenio Agustin idi Hunyo 3, 2017. Daytan ti rugi iti panakaipakat iti “law of succession”. Nagtakem ngarud a mayor ni bise mayor Jessie Ermitanio iti nasurok a makabulan. Nagbalin met ni first councilor Pambid a kas bise mayor.

Idi Hulyo 14, 2017, na-searched ti pagtaengan ni Ermitanio idiay Marcos town a nakaalan ti polisia kadagiti maipagarup a kolorum a paltog ken explosibo. Naarestar, nadetine ken nakasuan isuna. Ti nadagsen, naakusar pay nga isu ti mastermind iti panakapapatay ni mayor Agustin ken maysa a retirado a polis dita Marcos town.

Kas acting bise mayor ni Pambid, awtomatik a nadutokan isuna a mayor a nangsukat kenni Emitanio. Awtomatik met a pimmangal ni acting first councilor Allan Coloma ket nagbalin met isuna a bise mayor. Di nagbayag, kinedngan ti Ombudsman ni Pambid a madismiss isuna iti serbisyo iti gobierno gapu ti kaso administratibo nga inpila kontra kenkuana idi ABC presidente pay laeng ni Ermitanio.

Napalisi ngarud ni Pambid a kas acting mayor idi Agosto 16, 2017. Pimmangal ni Coloma nga isuna ti agdama ita nga acting mayor. Ita lawas, nabuak dagiti taga-Marcos agsipud ta binaliktad ti Ombudsman iti immuna a desisyona a nangdismiss ken ni Pambid kalpasan a nagballigi iti inpilana a motion for reconsideration.

Agsipudta nangabak ni Pambid iti kasona, rumbeng laeng nga agsubli a kas acting mayor iti ili tapno pagserbianna dagiti kakailianna nga inulila ti liderato daydi amana a Rogelio Pambid a napapatay met sumagmanon a tawen ti napalabas bayat nga isuna ti agdama idi a mayor iti ili.

Sapay koma ta makapudnon ti amin a maseknan nga agtuturay dita Marcos town. Matuldokan koman ti nakaro a panagsususik politikal, nangnangruna ti kultura iti pammatay. Agpannuray koma dita sibubukel a Marcos town ti talinaay, urnos, timpuyog ken nakappia a panagbiag para ti panagdur-as iti ili ken ti sapasap nga umili.#